Ish-deputeti i Partisë Demokratike, Ervin Salianji, u shpreh se protestat e të rinjve po i japin fund paktit mes Edi Ramës dhe Sali Berishës të arritur në vitin 2008, të cilin e cilësoi si një marrëveshje djallëzore që ka centralizuar pushtetin politik te dy individë.
Salianji deklaroi në rrjetet sociale se qytetarët e dalë në protesta masive nuk kanë më se çfarë të humbasin dhe nuk tremben nga forca e pushtetit apo e policisë. Ai theksoi se vendi po kalon një krizë të rëndë ekonomike dhe politike, ndërsa të rinjtë përballen me kosto të larta jetese, pamundësi për t'u arsimuar dhe mungesë shprese për të ndërtuar një të ardhme në vendin e tyre.
Sipas tij, ata që mendojnë se protestuesit janë të manipuluar gabojnë, ndërsa akuzoi kryeministrin Edi Rama se po i sulmon e nëpërkëmb në vend që t'i kuptojë. Ai shtoi se ky brez kërkon rrëzimin e sistemit aktual politik, duke u bërë thirrje qytetarëve të bashkohen në sheshe për të mbrojtur të ardhmen e rinisë dhe kundër një sistemi politik që e quajti antishqiptar.
