Deputetja e pavarur Marjana Koçeku i ka kërkuar trupit diplomatik në vend që të dënojë sjelljen e dhunshme të forcave të rendit dhe të angazhohet për zbardhjen e ngjarjeve në protesta.
Në një letër të hapur dërguar më 16 tetor 2026 përfaqësive të huaja, përfshirë Delegacionin e Bashkimit Evropian, Ambasadën e Shteteve të Bashkuara dhe OSBE-së, Koçeku ka shprehur shqetësimin e thellë për përdorimin e tepruar të forcës, trajtimin e protestuesve dhe përfshirjen e personave me rroba civile pa shenja identifikimi.
Ligjvënësja ka kërkuar hetim të plotë për operacionet e policisë, sqarimin e rolit të personave të paidentifikuar që kanë shoqëruar me forcë qytetarët, si dhe mbrojtjen e të drejtave të të miturve gjatë tubimeve.
Në gjashtë kërkesat e saj drejtuar ndërkombëtarëve, ajo kërkon reagim publik, nisjen e hetimeve të pavarura, monitorim të respektimit të të drejtave të njeriut dhe ngritjen e këtyre çështjeve pranë ekzekutivit shqiptar.
Sipas saj, rrugëtimi i Shqipërisë drejt Bashkimit Evropian është i lidhur ngushtë me mbrojtjen e lirive themelore dhe zbatimin e shtetit të së drejtës.
