Ministri i Punëve të Brendshme, Ervin Demo, zhvilloi një vizitë në Elbasan për të takuar familjet e dëmtuara nga shpërthimi në një pallat, duke inspektuar nga afër masat e ndërmarra për strehimin e tyre.
Gjatë takimit me banorët, të shoqëruar nga autoritetet vendore dhe qendrore, zyrtari i lartë theksoi se fokusi kryesor i shtetit mbetet mbrojtja e qytetarëve dhe dhënia e një ndihme të prekshme për çdo familje.
“Ne jemi këtu sot për të treguar vullnetin e qartë të të gjitha institucioneve që kjo situatë do të marrë një zgjidhje. Këtë problematikë do ta ndjekim në vazhdimësi, për të gjetur zgjidhjen afatgjatë”, u shpreh Demo.
Nga ana e tyre, banorët shprehën mirënjohjen për ndërhyrjen e shpejtë të zjarrfikësve dhe vlerësuan praninë e ministrit për të ndjekur shqetësimet e tyre. Aktualisht, Bashkia e Elbasanit po asiston përmes bonusit të qirasë për të mbuluar nevojat urgjente në këtë fazë kalimtare.
“Bashkia është këtu për të dhënë ndihmën dhe mbështetjen e parë, për të kaluar këtë periudhë tranzitore, por patjetër që kjo situatë kërkon një zgjidhje më afatgjatë. Këtu do të nevojitet ndërhyrja dhe bashkëpunimi i disa institucioneve”, u shpreh ministri.
Sa i përket fatit të ndërtesës, Demo bëri të ditur se vendimet do të merren pasi të dalë ekspertiza teknike nga inxhinierët, duke vendosur sigurinë e jetës në plan të parë.
“Jemi në pritje të raportit përfundimtar dhe, pas këtij raporti, alternativat që do të marrim në konsideratë do të bazohen mbi rezultatet e tij. Inxhinierët do të vlerësojnë strukturën e godinës dhe ndërhyrjet e mundshme që mund të kryhen. Në bazë të këtij informacioni do të përcaktojmë alternativat për t’i dhënë zgjidhje problematikës”, deklaroi Demo.
Në këtë vizitë morën pjesë gjithashtu prefekti i Qarkut Elbasan, Ilir Bejtja, kryetari i Bashkisë, Gledian Llatja, si dhe zyrtarë të Emergjencave Civile dhe Institutit të Ndërtimit, ndërsa kërkohet bashkërendim i vazhdueshëm për të shmangur vonesat.
