Autori Ben Blushi ka diskutuar rreth veprës së tij më të re, “Historitë e çmendura të Tiranës”, gjatë një interviste në emisionin “Minuta e Parë” në News24 me gazetaren Ola Bruko, duke ndarë detaje mbi motivet, figurat dhe epokat që kanë formësuar kryeqytetin.
Gjatë bisedës, ai vuri në dukje se për metropolin shqiptar ekzistojnë më pak botime në krahasim me qendra të tjera të kontinentit, ndërsa një pjesë e mirë e së kaluarës mbetet e pambuluar për shkak të mungesës së të dhënave arkivore. Përmes këtij botimi, krijuesi synon të mbushë këtë hapësirë dhe t'u shpjegojë lexuesve evolucionin e Tiranës nga një vendbanim oriental në kryeqytet.
Blushi sqaroi se vepra përbëhet nga afro 100 figura, 38 ndarje kapitujsh dhe përfshin një hark kohor prej katër shekujsh, duke e sjellë rrëfimin nën formën e një seriali të ngjashëm me platformat transmetuese, ku ngjarjet dhe njerëzit janë autentikë.
“Kam lindur në Tiranë. Është qytet që e dua shumë. Nga kujtimet e mia dhe të prindërve, është historia dhe keqardhja për Tiranën. Për Tiranën ka më pak libra se për qytetet e tjera europiane. Ka errësirë të madhe arkivore, gati 300 vite që janë të errëta. 100 vitet e fundit dimë shumë më shumë. Për të mbushur këtë boshllëk, se jetojnë 1 mln njerëz këtu, duhet të dinë se çfarë ka ndodhur në këtë qytet. Kush e themeloi, kush e ndërtoi, nga një fshat oriental u bë kryeqytet. Kush janë njerëzit që e ndërtuan,” u shpreh ai.
Më tej, ai shtoi: “Tirana që njohim është e dokumentuar, ka datë të themelimit 1614 nga Sulejman Pashë Bargjini, ndërsa libri ka rreth 100 personazhe. Libri është i shkruar si serial i Netflix. Jam përpjekur ta strukturoj, pasi kemi stresin se njerëzit lexojnë shumë pak, kam pak kohë. Ndaj libri është në 400 vjet, në 100 personazhe dhe 38 kapituj. Jam i kënaqur me librat e mia, por sa herë që kam një të tillë, humbas nga një mik. Shpresoj që mos të humbas një tjetër mik. Të lexosh këtë libër, do të duket sikur je në Paris. Të jesh personazh i këtij libri do të thotë; ose të jesh i çmendur, ose duhet të kesh vdekur. Kush është me emër në këtë libër, nuk jeton më. Për fat, ata që janë mes nesh, që janë personazhe të librit, janë miq të mi. Ata që janë të gjallë, gjithmonë mërziten, të vdekurit nuk e kanë ‘problem’.”
