Drafti paraprak i buxhetit për vitin 2027 parashikon të ardhura rekord prej afro 910 miliardë lekësh dhe shpenzime që pritet të arrijnë në 976 miliardë lekë, duke mos përfshirë më rritje të reja pagash.
Sipas të dhënave, të ardhurat pëfaqësojnë rreth 30.9% të Prodhimit të Brendshëm Bruto. Përllogaritur me kursin e tanishëm, shifra arrin rreth 10 miliardë euro, një vlerë e ndikuar nga zhvlerësimi i monedhës europiane. Krahasuar me buxhetin e rishikuar të vitit 2026, i cili llogaritet të arkëtojë 843 miliardë lekë, të ardhurat pritet të shënojnë një ngritje prej 7.7%.
Një element risi në projektbuxhet janë mbështetjet nga plani i rritjes, me rreth 7.6 miliardë lekë, kundrejt 961 milionë lekëve të një viti më parë, çka e çon totalin e ndihmave në 24.2 miliardë lekë. Burimi kryesor i arkëtimeve mbeten taksat, me të ardhurat tatimore që parashikohen në 853 miliardë lekë, ose 6.9% më shumë se plani i rishikuar i 2026-s.
Nga ky total, 583 miliardë lekë do të vilen përmes tatimeve dhe doganave, me një zgjerim prej 8.4%. Ndërkaq, nga sigurimet shoqërore pritet të mblidhen përafërsisht 211 miliardë lekë, duke shfaqur një ritëm më të ngadaltë prej 4.6%, çka sinjalizon një ecuri më të ngadaltë të shpërblimeve financiare. Për krahasim, gjatë vitit 2026 ky zë pritej të arrinte në 202 miliardë lekë, me një rritje prej 13%.
Të ardhurat nga njësitë e qeverisjes vendore llogariten në 58.8 miliardë lekë, me një rritje të lehtë prej 1.2%, pas hovit të madh prej 42% të shënuar në vitin 2026 si pasojë e lëshimit të lejeve të ndërtimit.
Sa i takon anës tjetër, shpenzimet e përgjithshme për vitin 2027 planifikohen në 976 miliardë lekë, që përbën një rritje prej 7.6% ndaj buxhetit të rishikuar paraprak. Pas dy vitesh ku pagat e administratës publike u ngritën me ritme të shpejta, buxheti i vitit 2027 nuk parasheh shtim të këtij fondi.
Shpenzimet për pagat do të jenë 122 miliardë lekë, duke shënuar një rritje prej vetëm 1.7% krahasuar me vitin 2026, ose 2 miliardë lekë më tepër. Për krahasim, fondi i pagave ishte rritur me 12.8% në 2026-n dhe me 11 miliardë lekë më shumë në vitin 2025.
Për nismat e reja në fushën e pensioneve janë akorduar 4 miliardë lekë, nga 1.65 miliardë lekë që ishin në 2026-n, ndërsa fondi për bonusin e lindjeve parashikohet në 2.8 miliardë lekë. Shpenzimet kapitale pritet të arrijnë shifrën rekord të 200 miliardë lekëve, nga 176 miliardë lekë të realizimit të pritshëm për këtë vit. Defekti i buxhetit, si diferencë mes të ardhurave dhe shpenzimeve, vlerësohet në 68 miliardë lekë.
