Kreu i shtetit ukrainas, Volodymyr Zelensky, e ka vlerësuar si “konstruktive dhe mjaft përmbajtjesore” ditën e parë të bisedimeve ndërmjet Ukrainës dhe Rusisë, të mbajtura në Abu Dhabi me ndërmjetësimin e ShBA-së.
Përmes një postimi në platformën X, ai njoftoi se ka dhënë udhëzime për vazhdimin e bisedimeve trepalëshe, si dhe për zgjerimin e kontakteve gjatë ditëve në vijim me zyrtarë amerikanë e evropianë.
Në qendër të bisedimeve ishin çështjet humanitare dhe garancitë e sigurisë për Ukrainën, ku sigurimi i lirisë për të burgosurit përbën një ndër prioritetet kryesore të palës ukrainase, ndërsa u shqyrtuan edhe mekanizmat për të siguruar stabilitetin afatgjatë dhe për të shmangur rikthimin e konfliktit.
Zelensky vuri në dukje po ashtu rëndësinë e hapave për zbutjen e tensioneve, duke shtuar se synimi primar mbetet arritja e një akordi paqeje.
Ai shprehu mirënjohjen ndaj Shteteve të Bashkuara për mbështetjen në organizim dhe ndaj Emirateve të Bashkuara Arabe për vënien në dispozicion të hapësirës së negociatave.
Nga ana e tij, Sekretari amerikan i Shtetit, Marco Rubio, i quajti bisedimet “shumë produktive”, ndërkohë që tërhoqi vëmendjen se ka ende shumë punë për të bërë deri në finalizimin e një marrëveshjeje.
Pas mbylljes së ditës së parë të takimeve, përfaqësuesit nga Ukraina bënë të ditur se diskutimet trepalëshe do të rinisin mëngjesin e nesërm.
