I ftuar në emisionin “Prime News24”, gazetari Poli Hoxha ka analizuar zhvillimet rreth protestave antiqeveritare dhe sjelljen e strukturave shtetërore ndaj protestuesve, duke ngritur shqetësimin për përfshirjen e forcave speciale të RENEA-s.
Hoxha u shpreh se reparti elitar RENEA, i cili është projektuar për operacione ndaj krimit të organizuar dhe terrorizmit, po keqpërdoret nga kryeministri Edi Rama përballë të rinjve që protestojnë. Sipas tij, një qasje e tillë dëshmon gjendjen e vështirë në të cilën ndodhet ekzekutivi dhe degradimin e institucioneve.
Gazetari shtoi se protestuesit veprojnë në mënyrë të organizuar dhe njoftojnë rregullisht policimin për tubimet e tyre, ndërsa autoritetet po përpiqen t'i largojnë nga sheshi para Kryeministrisë. Ai vlerësoi se sjellja e qeverisë tregon humbje nervash, pasi kreu i qeverisë kishte llogaritur se lëvizja do të shuhej.
Në përmbyllje të fjalës së tij, Poli Hoxha theksoi se pakënaqësia ka depërtuar edhe brenda strukturave të Partisë Socialiste, ndërsa vlerësoi datën 28 Nëntor si një pikë kthese të mundshme për këto tubime.