Kryeministri Edi Rama reagoi ashpër ndaj pretendimeve për largimin nga detyra të kryepolices së Tiranës, duke hedhur poshtë idenë se pozicioni i punonjësve lidhet me mbështetjen ndaj postimeve të Erion Veliajt.
Gjatë një deklarate, Rama ngriti pyetjen se si mund të shkarkohet një drejtuese që e ka mbajtur me dinjitet uniformën e kryepolicit bashkiak, vetëm sepse nuk ka interaktuar me postimet e Veliajt.
“Si mund të largohet një grua që e ka mbajtur me dinjitet uniformën e kryepolicit bashkiak të kryeqytetit, ashtu si të tjerë drejtues dhe punonjës, pse nuk u bëjnë ‘like’ e ‘share’ dorëshkrimeve të Lali-t nga burgu imagjinar politik, apo pse nuk gëzojnë mbështetjen e avokatit të tij?”, është shprehur Rama.
Kreu i qeverisë drejtoi kritika edhe ndaj avokatit të Veliajt, duke thënë se ai i adresohet Bashkisë së Tiranës në cilësinë e drejtuesit politik, pavarësisht se bën pjesë te personat e përjashtuar nga kjo strukturë.
Në përfundim, kryeministri nënvizoi se sjelljet arrogante ndaj qytetarëve nuk do të tolerohen dhe se askush nuk duhet të ushtrojë presion për shkak të qëndrimeve politike.