Deputeti i Partisë Demokratike, Belind Këlliçi, ka reaguar ashpër ndaj qëndrimit të krerëve të Prokurorisë së Posaçme lidhur me mosparaqitjen e një kërkese të dytë në Kuvend për heqjen e imunitetit të ish-zëvendëskryeministres Belinda Balluku. Sipas tij, shpjegimet e dhëna konfirmojnë nënshtrimin e SPAK-ut përballë kryeministrit Edi Rama dhe dështimin e institucionit përballë provave të reja të korrupsionit.
Në mesazhin e tij, ligjvënësi opozitar thekson se argumenti se kërkesa e re do të rrëzohej sërish me votë në parlament përbën një kompromis të rëndë dhe një goditje për besimin e qytetarëve tek drejtësia e re. Këlliçi ngre shqetësimin se ndërsa zbardhen dëshmi dhe pasuri të fshehura, zyrtarja vazhdon të gëzojë lirinë dhe pushtetin, duke sfiduar hapur ligjin.