Kreu i Komisionit Qendror të Zgjedhjeve, Ilirjan Celibashi, ka deklaruar se janë ndërmarrë hapat e duhur për të siguruar neutralitetin e administratës shtetërore në zgjedhjet vendore që do të mbahen më 9 maj 2027.
Gjatë një prononcimi për mediat, ai vuri në dukje se ndryshimet në Kodin Zgjedhor duhet të korrigjojnë sfidat e vërejtura në garat e kaluara, duke përfshirë ndikimin e shtetit, sjelljen e zyrtarëve, rregullat e financimit dhe procedurat e numërimit. Celibashi u shpreh se megjithëse disa nga këto çështje duhet të ishin zgjidhur më parë, aktorët politikë kanë ende hapësirë kohore për të arritur një marrëveshje.
“Kemi marrë masat e nevojshme për të garantuar paanshmërinë e administratës publike. Këto masa, siç rekomandohet dhe në raportet e vëzhgimit ndërkombëtar, do të duhet të jenë efektive, duke shmangur jo vetëm ndërhyrjet e paligjshme. Kjo çështje merr rëndësi dhe në kontekstin e raporteve të vëzhguesve. Lidhur me ndryshimet në Kodin Zgjedhor për zgjedhjet e 7 majit, është me rëndësi që të adresohen në ndryshime edhe problematikat e proceseve të mëparshme zgjedhore. Siç janë: roli i shtetit në përgjithësi në procesin zgjedhor dhe sjellja e administratës publike në këtë proces, kontrollet për fushatën zgjedhore dhe financimet, apo edhe numërimi dhe nxjerrja e rezultateve. Reforma zgjedhore, një pjesë të këtyre çështjeve do të duhej t’i kishte përfunduar. Por ka ende kohë që palët politike t’i adresojnë dhe më pas t’ia përcjellin KQZ-së për ndryshimet ligjore të rastit.”, tha ai.
Lidhur me ndarjen e re territoriale dhe përshtatjen e normave të Kodit Zgjedhor, drejtuesi i institucionit zgjedhor sqaroi se baza ligjore aktuale zbatohet ashtu siç është dhe nuk ka hapësirë për diskutime jashtë kornizave ekzistuese.
“Ne e kemi sot në fuqi ligjin për ndarjen e re territoriale dhe nuk mund të amendojmë se çfarë do të ndodhë në vendime të palëve të interesuara. Ne nuk kemi shkak ligjor për të diskutuar për këtë çështje.”, tha ai.
