Binance ka bërë të ditur se ka nisur fazën e parë të tërheqjeve, pas sulmit kibernetik rekord prej 6.3 miliardë dollarësh, për të cilin FBI-ja fajëson Korenë Veriore.
Platforma e kriptomonedhave njoftoi se ka rihapur rrjetin e saj Bitcoin në kuadër të fazës së parë të rinisjes së tërheqjeve, pasi sulmi i së enjtes çoi në pezullimin e transaksioneve të përdoruesve.
“Grupi i parë i rrjetit që tani është hapur në fazën e parë të tërheqjeve është rrjeti i bitcoin $BTC,” u shpreh Binance në platformën X.
Në një njoftim të mëparshëm në X të dielën, Binance kishte bërë me dije se do t'i vinte në dispozicion shërbimet e tërheqjes në disa faza, të cilat do të shtohen gradualisht, ndërsa përditësimet do të jepen në kanalin e saj zyrtar.
“Ne po ndjekim një qasje me faza duke i dhënë përparësi zetonëve bazuar në të dhënat e javës së kaluar të kërkesës së përdoruesve, në mënyrë që çdo rrjet dhe çift asetesh të mund të rikthehet me kujdes, pasi të kenë përfunduar kontrollet e stabilitetit dhe sigurisë përpara se të rihapet qasja,” tha Binance.
Kompania sugjeroi që përdoruesit të kontrollojnë faqen e tërheqjeve për aktivin dhe rrjetin e tyre të zgjedhur, ose të vizitojnë faqen e statusit të rrjetit Binance për të konfirmuar disponueshmërinë.
Gjatë këtij procesi me faza, pritet të ketë mbingarkesë, kohë më të gjata përpunimi dhe vonesa të përkohshme, ndaj nëse një tërheqje dështon, përdoruesit duhet të provojnë sërish pas një kohe të shkurtër, këshilloi Binance.
Cointelegraph raportoi të shtunën se Binance kishte deklaruar se kishte plotësuar 90% të aseteve të vjedhura në sulm, një rritje nga 80% një ditë më parë, dhe se mbetej në rrugën e duhur për të rifilluar tërheqjet të dielën.
