Në një intervistë televizive, gazetari investigativ Artan Hoxha diskutoi mbi vonesat e SPAK-ut në trajtimin e krimeve zgjedhore dhe ndikimin e tyre në Kuvend.
Hoxha vuri në dukje se procedimet e nisura dy vite pas ngjarjes nuk sjellin ndryshime thelbësore në peshën politike, duke dhënë shembullin se largimi i një deputeteje ia kalon vendin një tjetre nga e njëjta forcë politike: “Po hetohet një krim zgjedhor mbas dy vitesh, në vend që ta hetonim kur duhej hetuar, pra që të mos e lejonim Sara Milën të vinte në Kuvend. Tani dhe po hoqëm Sarën, mandati i ngelet Ramës. Do heqim Sarën, do vijë Klara.”
Më tej, ai solli në vëmendje keqpërdorimin e fondeve publike gjatë fushatës në Gjocaj, ku numri i personave që merrnin ndihmë ekonomike u trefishua nga 110 në 320, duke përfshirë edhe qytetarë që jetonin jashtë vendit pa dijeninë e tyre.
Në mbyllje të fjalës, ai tërhoqi vëmendjen se afërsia e një viti të ri elektoral me një buxhet të lartë paraqet rrezikun e përsëritjes së këtyre praktikave, nëse shoqëria nuk reagon ndaj abuzimit me institucionet shtetërore.