Kryeministri i Kosovës dhe drejtuesi i Lëvizjes Vetëvendosje, Albin Kurti, ka folur rreth zhvillimeve dhe protestave të fundit në Shqipëri, duke shprehur pështjellim lidhur me tentativat për ta lidhur partinë e tij me ngjarjet e dhunshme.
Gjatë mbledhjes së 64-t të Këshillit të Përgjithshëm të Lëvizjes Vetëvendosje, Kurti theksoi se formacioni i tij politik aktualisht qeveris dhe nuk udhëheq protesta, duke shtuar se nuk do të lejojë përdorimin për qëllime të caktuara nga askush. “Kam parë me habi se si zëra të ndryshëm janë përpjekur t’ia faturojnë edhe Vetëvendosjes këto protesta, por ne sot jemi forcë qeverisëse dhe jo forcë protestuese. Edhe kur kemi qenë forcë protestuese, protestave u kemi dalë në ballë vetë dhe kurrë nuk kemi ndenjur anonimë”, tha ai.
Kreu i ekzekutivit kosovar shtoi se ngjarjet në Shqipërinë fqinje përcillen me vëmendje dhe ndjenjë përgjegjësie, ndërsa e cilësoi ecurinë demokratike të shtetit shqiptar si detyrim të përbashkët historik kombëtar.
Duke u ndalur te përplasjet e ndodhura gjatë tubimeve, Kurti dënoi dhunën dhe dëmtimin e qytetarëve, duke vënë në dukje se përveç ndëshkueshmërisë ligjore, duhet analizuar thellësisht faktorët që sjellin acarimin e gjendjes. “Rendi publik dhe liria e protestës duhet të mbrohen njëkohësisht”, deklaroi ai.
Në fund, Kurti foli edhe për lidhjet dypalëshe mes Kosovës dhe Shqipërisë, duke pohuar se të dyja palët nuk kanë qenë dhe s'do të jenë kurrë konkurrente, teksa konfirmoi mbështetjen për integrimin evropian të Shqipërisë dhe bashkëpunimin e gjithanshëm në ekonomi, infrastrukturë, arsim e siguri.
