Një sulm i gjerë kibernetik në platformat e njoftimit të emergjencave në Rusi dhe Ukrainë ka përhapur frikë te banorët, të cilët morën sinjalizime të rreme për rrezik radiacioni dhe goditje bërthamore. Autoritetet në të dyja shtetet ndërhynë shpejt për të sqaruar situatën dhe për të qetësuar opinionin publik.
Vala e parë e incidenteve u regjistrua në territorin ukrainas, ku softueri zyrtar i sinjalizimeve ajrore shfaqi të dhëna të pavërteta mbi nivelet e rrezatimit në Kiev dhe rajone të tjera. Forcat Ajrore të Ukrainës dhanë menjëherë sqarime përmes një njoftimi në Telegram se platforma ishte hakuar, duke theksuar se: “Aplikacioni i paralajmërimit për sulme ajrore duket se është kompromentuar. Nuk ka kërcënim nga rrezatimi! Qëndroni të qetë dhe ndiqni përditësimet tona”. Përfaqësuesi i tyre, Yuriy Ignat, vërtetoi se bëhej fjalë për një ndërhyrje kibernetike që solli mesazhe për luftimet në rrugët e kryeqytetit apo paralajmërime për një sulm bërthamor në mbarë vendin.
Situata pati zhvillime të ngjashme edhe në Rusi, ku Ministria e Emergjencave raportoi se rrjeti i saj digjital u godit nga një sulm i rëndë që shpërndau njoftime të rreme. Në një nga mesazhet drejtuar qytetarëve thuhej se dronët ukrainas kishin hedhur mbushje bërthamore nëpër të gjitha zonat ruse, duke kërkuar sigurimin e ushqimeve për tri javë dhe strehimin në bodrume. Teksti dërguar njerëzve ishte: “Kokat bërthamore janë lëshuar me transportuesit P1-SUN në të gjitha rajonet e Rusisë! Furnizohuni urgjentisht me ushqime për tre javë dhe fshihuni në bodrumin tuaj”. Këto njoftime u shfaqën në Moskë, Shën Petersburg, Belgorod, Nizhny Novgorod, Tyumen, Tula, Chelyabinsk e zona të tjera. Autoritetet ruse njoftuan se po punojnë për rikthimin e funksionalitetit, ndërsa qendra ukrainase SPRAVDI akuzoi Moskën, ndërsa nga ana ruse ende nuk ishin përcaktuar autorët e ndërhyrjes në sistemin e tyre.
Këto ngjarje ndodhën në një periudhë tensionesh, pak para skadimit të një armëpushimi gjashtëditor në Oleshky të Khersonit, i cili mundësoi një aksion humanitar për evakuimin e qindra civilëve. Ndërkohë, vijuan përplasjet mes dy palëve në infrastrukturën energjetike dhe zonat e magazinimit ushtarak, duke ngritur shqetësime të thella për sigurinë e popullsisë civile.
