Gjatë protestës së radhës kundër qeverisë, aktivisti Mirjan Aliaj ka lëshuar akuza të forta ndaj kryeministrit Edi Rama, duke e krahasuar atë me udhëheqësin bjellorus Aleksandr Lukashenko.
I pranishëm në tubim, Aliaj deklaroi për News24 se masat e ndërmarra nga kreu i ekzekutivit janë në kundërshtim me Kushtetutën. Sipas tij, vendosja e gjobave synon frikësimin e qytetarëve dhe studentëve, por theksoi se ata nuk do të tërhiqen.
"Askush nuk e ndal protestën. Mendoj se askush nuk e di se kur do të ndalet protesta, sepse janë artikuluar disa kërkesa, që me kohën janë kristalizuar", u shpreh ai.
Gjithashtu, aktivisti përsëriti thirrjen për largimin e kryeministrit: "Ne kërkojmë dorëheqjen e kryeministrit Rama. Ne kërkojmë qeveri teknike, për të krijuar kushtet për një demokraci funksionale në Shqipëri. Rama përdor metodat e Lukashenkos, kishte edhe protesta në Bjellorusi dhe kështu veproi dhe lideri autoritar bjellorus."
Në mbyllje të fjalës së tij, Aliaj u ndal te e drejta kushtetuese e tubimit: "Masat e Ramës janë antikushtetuese. Qytetarët kanë thënë se nuk mund të merret leje për protesta, mjafton njoftimi. Gjykata ka shpallur të pafajshëm protestuesit, sepse është e drejta e qytetarëve të protestojnë. Edhe gjobat që vendosen janë për të frikësuar studentët, por se nuk do ia dalin."
