Një gjykatë në Londër ka forcuar shanset e autoriteteve britanike për të ruajtur shumicën e 3.8 miliardë paundëve në bitcoin të sekuestruar, pasi vendosi se mijëra viktimë kineze të mashtrimit nuk mund të përdorin ligjin anglez për të kërkuar monedhat.
Vendimi prek 61,000 BTC të sekuestruara nga Policia Metropolitane e Londrës gjatë hetimeve ndaj Zhimin Qian, e cila pranoi fajin për mashtrimin e mijëra personave në Kinë. Qian drejtoi një skemë piramidale përmes kompanisë së saj, Tianjin Lantian Gerui Electronic Technology, duke zhvatur mbi 128,000 investitorë nga viti 2014 deri në 2017. Ajo i ktheu miliardët e vjedhur në bitcoin dhe u arratis në Britani në 2017.
Të dëmtuarit kishin argumentuar se legjislacioni anglez duhet të zbatohej, pasi do t'u kishte dhënë mundësinë të pretendonin të drejta pronësie mbi pasurinë multi-miliardëshe në kriptomudha. Megjithatë, në një vendim të së hënës, gjyqtari Mark Turner i Gjykatës së Lartë të Londrës mbajti anën e autoriteteve britanike, duke vendosur se për shkak se mashtrimi bazë ndodhi plotësisht në Kinë, ligji kinez dhe jo ai anglez duhet të rregullojë pretendimet e tyre pronësore.
“Dëmi përkatës ka ndodhur në Kinë. Aplikantët i dhanë paratë e tyre në Kinë. Përfaqësimet e pretenduara mashtruese u bënë në Kinë,” theksoi gjyqtari. “Marrëdhëniet kontraktuale të krijuar në këtë mënyrë u lidhën në Kinë. Pasojat e menjëhershme ekonomike të keqbërjes së pretenduar u pësuan gjithashtu në Kinë.”
Vlen të përmendet se vendimi nuk përcakton përfundimisht se kush do t'i mbajë bitcoin-et. Megjithatë, ai ngushton rrugën e viktimave drejt rikuperimit dhe përmirëson gjasat që Thesari britanik t'i mbajë përfundimisht ato. Avokatët e viktimave po bëjnë apel, sipas Financial Times. Prokuroria e Kurorës bëri të ditur se një seancë e radhës do të përcaktojë nëse ndonjë prej viktimave mund të provojë ndonjë interes në bitcoin.
