Kreu i ekzekutivit Edi Rama ka reaguar në lidhje me tubimet e fundit, duke aluduar për praninë e elementëve të huaj dhe aktorëve politikë që po devijojnë synimet e vërteta të protestuesve.
Gjatë një prononcimi pranë një godine të përfshirë nga flakët, kreu i qeverisë u shpreh se ngjarjet e orëve të fundit nuk përkojnë me hallet dhe kërkesat legjitime të të rinjve. Ai fajësoi forcat opozitare për nxitjen e akteve të dhunës dhe përpjekjet për të bllokuar ecurinë e shtetit.
Gjithashtu, kryeministri deklaroi se pas këtyre lëvizjeve fshihen ndikime të jashtme që synojnë destabilizimin e vendit dhe pengimin e procesit të integrimit evropian. Për më tepër, ai pranoi se qytetarët dhe nxënëset e studentët kanë plotësisht të drejtë të kërkojnë kushte më të mira jetese dhe zgjidhjen e shqetësimeve të tyre të përditshme.
Krerët e shtetit nuk do të lëshojnë pe përballë akteve të dhunshme, ndërsa u bë thirrje që çdo pakënaqësi të adresohet duke ruajtur qetësinë dhe sigurinë e përgjithshme.
Kryeministri Edi Rama: "Si mund të jenë studentët, si mund të jetë investimi i prindërve tek fëmijët e tyre kjo gërmadhë. Kjo nuk ka lidhje me studentët, nuk është më studentore. Pengmarrja e qytetit me maska, nuk ka të bëjë më hallet, me problemet me aspiratat e gjithkujt që do një jetë më të mirë. Është po ajo dorë, që ka kapur për fyti opozitën shqiptare që ka djegur Shqipërinë jo një herë dhe që është gati ta djegë përsëri për ta mos e lënë të bëjë përpara në një luftë qorre, ku urretja më e verbër janë e vetmja dritë arsye. Këta nuk janë studentët, as ata që marrin peng gjatë ditës qytetin nuk janë studente."
"Si mund të nxirren të miturit në rrugë, si mund të nxiten të miturit të vënë maska, të shkulin trotuarin dhe të qëllojnë policinë? Si mund të rrezikohet jeta e të miturve duke i hedhur në rrugë për axhenden e tjetër kujt. Dora e vjetër që e ka ndjekur Shqipërinë, dhe e dimë se e kujt është sot mbështet edhe nga duart e huaja që nuk e duan Shqipërinë të qetë, nuk e duan Shqipërinë të shohë drejt dhe të ecë përpara, që nuk e duan Shqipërinë pjesë të familjes së BE. Nuk e duan Shqipërinë të lirë, për të qenë bashkë me popujt e tjerë. A ju duket rastësi që sapo Shqipëri afrohet më shumë drejt objektivit historik, këtu plas flaka? Nuk është aspak rastësi. Kjo që po ndodh është një test i karakterit tonë, është një tjetër hap që ne do ta hedhim së bashku përballë një pengesë artificiale."
"Po, studentët, sipërmarrësit, njerëzit e zakonshëm kanë të drejtë të kërkojnë më shumë. Problemet duhen adresuar, jemi këtu për të bërë më të mirën me aq sa dimë dhe të bëjmë më mirë. Mos e harroni se e kemi sjellë Shqipërinë deri këtu. Këtë nuk e ka sjellë as koha, as rrethana, por një punë këmbëngulëse. Kush thotë që të përkulemi përballë dhunës për pak qetësi gabon, sepse kjo do të thotë ta humbësh qetësinë dhe ta humbësh rrugën për një kohë të gjatë."
