Konflikti në Iran dhe sfidat e kostos së jetesës pritet të jenë në qendër të zgjedhjeve të mesit të mandatit në SHBA, duke rrezikuar kontrollin e Kongresit për republikanët.
Në kohën kur popullariteti i Donald Trump shënon rënie, demokratët synojnë të rimarrin mandate në zona të ndryshme konkurruese, përfshirë territore tradicionale të djathta si Teksasi.
Çfarë janë zgjedhjet e mesit të mandatit në SHBA?
Këto zgjedhje zhvillohen dy vite pas votimit presidencial dhe shërbejnë shpesh si një matës i opinionit për administratën në fuqi, ku fitimet dhe humbjet e partive reflektojnë këtë klimë.
Ditën e martë, qytetarët do të votojnë për të gjitha 435 vendet në Dhomën e Përfaqësuesve dhe për një të tretën e Senatit, i cili përbëhet nga 100 vende në total.
Në fletët e votimit mund të përfshihen gjithashtu edhe pozicione të tjera vendore, si ai i guvernatorit.
Garë e ngushtë për Dhomën e Përfaqësuesve
Të dyja dhomat e Kongresit drejtohen aktualisht nga Partia Republikane, por ky raport forcash mund të ndryshojë së shpejti.
Përfaqësuesit republikanë zotërojnë një epërsi shumë të lehtë, me 218 vende kundrejt 214 vendeve të demokratëve, ndërsa një vend mbahet nga një i pavarur dhe dy mbeten vakante.
Sipas parashikimeve të fundit nga instituti jo-partiak Cook Political Report, 186 mandate të Dhomës vlerësohen si “demokrate të forte”, 18 si “demokrate të mundshme” dhe 16 të tjera si “demokrate të dobëta”.
Në krahun tjetër, 168 mandate konsiderohen si “republikane të forta”, 13 si “republikane të mundshme” dhe 17 si “republikane të dobëta”.
Vendet e mbetura, gjithsej 17, llogariten si zona përplasjeje, ku 12 mbahen aktualisht nga e djathta dhe pesë nga e majta.
Po Senati?
Edhe pse Dhoma e Përfaqësuesve shihet si institucioni me mundësinë më të madhe për të kaluar te demokratët, rënia e mbështetjes për Trump bën që edhe Senati të mbetet në lojë.
Ndryshe nga Dhoma e Përfaqësuesve, vetëm pak më shumë se një e treta e Senatit është në garë këtë nëntor. Nga 35 vendet në total, analiza e Cook Political Report i klasifikon 12 si “republikane të forta”, dy si “republikane të mundshme” dhe një si “republikane të dobët”.
Nga radhët e kundërta, nëntë vende vlerësohen si “demokrate të forta”, dy si “demokrate të mundshme” dhe dy si “demokrate të dobëta”, duke lënë shtatë vende të tjera si të pasigurta — ku gjashtë mbahen nga republikanët dhe një nga demokratët — të mjaftueshme për të prishur balancën aktuale.
Konservatorët kontrollojnë tani 53 ulëse në Senat kundrejt 47 të demokratëve, duke siguruar një avantazh prej tre votash. Demokratëve u duhet një shtim prej katër mandatesh për të siguruar shumicën, pasi zëvendëspresidenti jep votën përcaktuese në rast barazimi 50-50.
