Vlerat e naftës kanë vijuar të bien edhe këtë të martë, pasi tregjet po shpresojnë te bisedimet diplomatike midis Shteteve të Bashkuara dhe Iranit për mbylljen e konfliktit rajonal.
Referencat kryesore shënuan ulje, ku nafta Brent pësoi një rënie prej 1.31% duke arritur në 91.36 dollarë për fuçi, ndërsa ajo amerikane West Texas Intermediate (WTI) zbriti me 1.59% në 85.47 dollarë për fuçi. Të dyja kontratat kanë pësuar një humbje prej afërsisht 20% gjatë këtij muaji, pasi tregtarët po analizojnë gjasat e një marrëveshjeje për t'i dhënë fund përleshjeve që zgjasin prej shtatë muajsh, të cilat kanë nxitur inflacionin dhe shtrëngimin e normave të interesit nga bankat qendrore.
Optimizmi për qetësimin e situatës u rrit pas fjalëve të presidentit amerikan Donald Trump, i cili gjatë së hënës përmendi një “moment pozitiv” drejt mbylljes së luftimeve, pas një takimi në Shtëpinë e Bardhë me kryeministrin e Katarit, Sheikh Mohammed bin Abdulrahman bin Jassim Al Thani.
“Kam zhvilluar një bisedë të shkëlqyer me të”, shkroi Trump në rrjetin social Truth Social, duke shtuar se në takim u fol gjithashtu gjerësisht rreth Republikës Islamike të Iranit.
Megjithëse para zgjedhjeve të mesmandatit në SHBA pati aludime se Uashingtoni mund të ndërmerrte sulme të reja ndaj Iranit këtë muaj, Trump ka zbutur qëndrimin për një mundësi të tillë, pa e hedhur poshtë plotësisht. Në prononcimin e tij të fundit, kreu i shtëpisë së bardhë ritheksoi se SHBA-të janë “të gatshme dhe të armatosura”, por shtoi se goditjet e mëtejshme janë “mjaft të pamundura”. Sipas tij, partnerët kryesorë të SHBA-së në Gjirin Persik mbështesin ruajtjen e status quo-së dhe parandalimin e një përshkallëzimi të ri.
Këto deklarata përkojnë me ato të dhëna gjatë fundjavës për CNN, ku ai e quajti “shumë të pamundur” rifillimin e përplasjeve. Këto zhvillime diplomatike kanë ndikuar te tregjet, ku investitorët po kalkulojnë mundësinë e zbutjes së tensioneve dhe kthimit gradual në normalitet në rajon.
